Bangladesh : Abantu 50 bakubiswe n’inkuba

Abantu bagera kuri mirongo itanu muri Bangladesh bapfuye bahitanywe n’inkuba muri iyi minsi ibiri iheze, nk’uko bimenyeshwa n’igiporisi.

BBC ivuga ko abenshi mu bakubiswe n’inkuba ari abantu b’abirimizi bari mu ndimo zabo.
Bangladesh yari isanzwe ikunda gushikirwa n’imiravyo, ariko uno mwaka bikaba vyararenze urugero.

Abahinga bavuga ko bishobora kuba vyaturutse ku bushuhe, hamwe n’ikibazo co guhonya amashamba.

Mu bandi bapfuye harimwo abanyeshure babiri baguye ku murwa mukuru Dhaka, bakubiswe n’inkuba bariko bakina umupira, hamwe n’umuhungu w’umuyabaga yapfuye agiye kwamura imyembe.

Abantu 90 barishwe kuva mu kwezi kwa gatatu bahitanywe n’inkuba, ugereranije n’abagera ku 51 bapfuye muri ubwo buryo mu mwaka uheze wose.

Uwujejwe gutabara no guteganiriza kurwanya ibiza muri Bangladesh, Mohammad Riaz Ahmed, yabwiye ikigo c’itangazamakuru VOA, ko atewe umwitwarariko n’ibitigiri vy’abantu bishwe n’inkuba.

Mohammad Riaz yamenyesheje ko biteze ko haba iyindi mituragaro mu mpera z’uku kwezi kwa Rusama.

Ibihuhusi birakunze kwizizira igihugu ca Bangladesh, igihe haba himirije canke mu gihe c’impeshi n’ici nyezina.