REGIDESO: ’’Ntiturota dukora umugambi ugayitse nk’uyo’’

Ubuyobozi bw’ishirahamwe ritanga amazi n’umuyagankuba(REGIDESO) burabeshuza amakuru yatanzwe n’abanyagihugu, babicishije mu buhinga ngurukana bumenyi, aho bamenyesha ko iryo shirahamwe rifise umugambi wo kurungika umucanwa mwishi kugira uturire amazu.

Mu gihe abarundi benshi bemeza ko baronka amakuru atandukanye amwe ugasanga ari ayaca ivutu, mw’ijoro ryo kuri uwu wa kabiri rishira uwa gatatu, abenegihugu batari bake bo mu gisagara ca Bujumbura, bararonse inkuru ko ishirahamwe REGIDESO ryoba rifise umugambi wo kurungika ibigira nkana, umucanwa mwinshi mu ma kartier amwe amwe, cane cane arya ariko aberamwo imyiyerekano, yo kwiyamiriza ikiringo ca gatatu c’Umukuru w’igihugu, kugira ngo amazu ace asha.

Ayo makuru ntiyatevye kubeshuzwa, nk’uko bivugwa n’ubuyobozi bw’iryo shirahamwe rya REGIDESO, umugambi ugayitse nk’uyo ntawo barota bakora. Baranahumuriza abanyagihugu bo mu gisagara ca Bujumbura ko batazigera baja mu b’ububisha nk’ubwo kandi ko bitazigera bishika.

Aho mukamenya ko hari n’amakuru yavugwa ko n’imihora yo gutumatumanako amakuru mu ma kartier arimwo imyiyerekano yoba igiye guhagarikwa.