FFB : Abakinyi batatu bahiganirwa agashimwe k’umukinyi yigenjeje neza bamenyekanye

Umunyegori Jonathan NAHIMANA wa Vital’O FC, URASENGA Danny Cédrick akina hagati mu murwi Messagerr Ngozi na SHAKA Bienvenue umusatirizi wa Aigle Noir, nibo barik bahiganirwa agashimwe gahabwa umukinyi yigenjeje neza mw’ihiganwa.

Amakuru dukesha ishirahamwe ry’umupira w’amaguru mu Burundi FFB, amenyesha ko umukinyi yaranze umwaka, azomenyekana kw’igenekerezo rya 1 Ruheshi 2018, mu birori bitari bwabe mu Burundi vyiswe Soirée de gala.

Ayo makuru nyene y’ishirahamwe ry’umupira w’amaguru mu Burundi FFB, amenyesha ko muri ivyo birori, hazotangwa kandi ubushimwe ku bakinyi 11 bagize umurwi w’akarorero w’umwaka, ku mukinyi akiri muto yigenjeje neza, ku mukinyi yarushije abandi ibitsindo hamwe n’agashimwe ku mukinyi yigenjeje neza mu Barundi bakinira mu mahanga.

Abo bakinyi batatu bahiganirwa agashimwe k’umukinyi yigenjeje neza, batowe mu bakinyi 10 bari bashizwe ahabona n’ishirahamwe ry’umupira w’amaguru FFB, abo nabo bakaba ari : Slim Saidi (Olympic Star), Pascal Ramadhan (Olympic Star), Iddy Museremu (Messager Ngozi), Sefu Thomson Ndizeye (LLBS4A), Fabien Mutombora (LLBS4A), Mabano Shabani (Aigle Noir) na Eric Kwizera (Les Lierres), hagaca hajako na batatu bariko barahiganirwa ico kibanza.

Umurwi Messager Ngozi ukaba ariwo watahukanye igikombe c’ihiganwa ry’umupira w’amaguru mu cicaco ca mbere mu mwaka wa 2017 ushira uwa 2018, ukaba wahejeje ihiganwa ufise amanota 70.

Danny Cédrick URASENGA wa Messager Ngozi

Jonathan NAHIMANA, umunyezamu wa Vitalo FC

SHAKA Bienvenu wa Aigle Noir