FFB yasiguye icatumye umurwi nserukiragihugu w’Uburundi utebera ku kibuga c’indege ca Sudani

Umukuru w’ishirahamwe FFB Reverien NDIKURIYO amenyeshako uko urugendo rwari rutunganije n’ishirahamwe ryatanze amatike ,umurwi nserukiragihugu w’Uburundi warigushika ku kibuga c’indege i Khartoum mu gitondo kw’igenekerezo rya 18 Rusama 2018 mu nyuma biza guhindurwa ariko ntivyamenyeshwa arivyo vyatumye umurwi w’Uburundi utebera kurico kibuga c’indege.

Ishirahamwe ry’umupira w’amaguru mu Burundi rivuga ko bamwe mu banditse amakuru ajanye n’ico kibazo batabajije mw’ishirahamwe FFB kugira baronke umuco mu gihe hari abariserukira bari mu rurwo rugendo.

FFB rimenyeshako abahinduye uko urugendo rutunganije baza barasavye imbabazi eka no k’uruhande rw’ishirahamwe ry’umupira w’amaguru mu Burundi basavye imbabazi ishirahamwe ry’umupira w’amaguru ryo muri Sudani kurivyo vyashitse.

Umurwi nserukiragihugu w’Uburundi “Intamba mu rugamba” wabatarenza imyaka 20 uzokina urukino rwo gusubiza kuruyu w’Imana igenekerezo rya 20 Rusama 2018 mu rukino rwa mbere rwabereye hano i Burundi ,imirwi yose yatahukanye inota rimwe mu kuganya igitsindo kimwe ku kindi.