Saido Berahino yankiwe kuja gukinira umurwi Tottenham Hotspur

Umurwi West Bromwich Albion ukina mu cicaro ca mbere mu gihugu c’Ubwongereza wankiye umukinyi w ‘umusatirizi Saido Berahino ava mu gihugu c’Uburundi kwimukira mu murwi Tottenham Hotspur.

Mu gihe isoko y’abakinyi yaheze mu gihugu c’Ubwongereza yahagaze kw’igenekerezo rya 1 Nyakanga 2015,umurwi Tottenham Hotspur, wagerageje incuro zine kugura umukinyi Berahino ariko umurwi akinira West Bromwich Albion, uranka kumurekura.

Saido Berahino avuga ko yababajwe n’ukungene umurwi wiwe West Bromwich Albion wamufashe,mu kumwankira kuja gukinira umurwi wa Tottenham Hotspur.Yavuze ko umurwi West Bromwich Albion wanse kumurekura atazosubira kuwukinira mu gihe cose Jeremy Peace ariwe azoba akirongoye uwo murwi.

Saido Berahino asanzwe akina kandi mu murwi nserukiragihugu w’Ubwongereza w’abakinyi badashikana imyaka mirongo ibiri n’umwe, yinjije ibitsindo 22 mu murwi wiwe, West Bromwich Albion mw’ihig.nwa ry’umwaka w’2014-2015.

Umurwi Tottenham wari wemeye gutanga ku ncuro ya kane imiliyoni 24 z’amapaound, n’ukuvuga hafi imiliyoni 37 z’amadolare y’abanyamerika, mu gihe umurwi West Bromwich wo washaka imiliyoni 25 z’amapounds.