’’Ikiza ca Ebola ntikirashika mu Burundi’’-Thadée NDIKUMANA

Mu kiganiro yahaye abamenyeshamakuru kur’uyu wa gatanu igenekerezo rya 11 Rusama 2018, Muganga Thadée NDIKUMANA aramutswa ubushikiranganji bw’amagara y’abantu no kurwanya Sida yavuze ko indwara ya Ebola ivugwa muri Kongo itayihari mu Burundi.

Muganga Thadée NDIKUMANA yamenyesheje ariko ko, ingingo zose zishoboka zamaze gufatwa kugira bakinge ico kiza, nticinjire ku butaka bw’Uburundi.

Thadée NDIKUMANA, umushikiranganji w’amagara y’abantu no kurwanya Sida

Iyo ndwara ya Ebola yatanguye kwibonekeza kuwa kabiri igenekerezo rya 8 Rusama 2018, aho abantu babiri babonetse bafise ibimenyetso vy’iyo ndwara, mu gisagara ca Bikoro, kiri mu Buraruko bushira Uburengero bwa Republika Iharanira Intwaro Rusangi ya Kongo.