Abari baheze mu bitaro kubera kubura amahera yo kuriha ibitaro bafashijwe

Abasirikare bo muri batayo ya 21 ya AMISOM nibo batanze imfashanyo ku barwayi bari mu bitaro bitandukanye vy’igisagara ca Bujumbura.

Imfashanyo yatanzwe n’abo basirikare ikaba yangana n’amafaranga agera ku miriyoni zirenga zine. Iyo mfashanyo ikaba yatanzwe mu mice ibiri. Umuce umwe ukaba wari uwo gufasha abarwariye mu bitaro bitandukanye, uwundi muce ukaba wari uwo gufasha abasirikare batashoboye kurangiza ibikorwa vyo kugarukana amahoro mu gihugu ca Somaliya bivanye n’ingorane zitandukanye.

Mu bitaro vyatanzwemwo imfashanyo, akaba ari ibitaro vya Prince Regent Charles, ibitaro vy’abarwaye mu mutwe mu Kamenge, hamwe no mu bitaro vy’abasirikare vyo mu Kamenge. Abanyagihugu bahawe imfashanyo bari barwariye muri ivyo bitaro bitatu, bakaba bashimye rwose imfashanyo. Akarorero akaba ari ako umunyagihugu yitwa Oscar Miburo ava muri komine ya Mwumba yagize isanganya, akaba yarihiwe ibitaro, aho yari aheranye amafaranga agera ku bihumbi 315.