FNL: Abayoboke ba Agathon Rwasa mu ntara z’Uburaruko ntiborohewe

Bamwe mu banywanyi b’umugambwe FNL ishami rya Agathon Rwasa mu ntara za kirundo na Muyinga ntiborohewe, aho uwurongoye uwo mugambwe muri komine ya Gasorwe co kimwe n’uwuwurongoye mu ntara ya Muyinga eka n’i Busoni, bafashwe, barapfungwa.

Amakuru dukesha bagenzi bacu bakorera radiyo Isanganiro muri izo ntara, akavuga ko abanywanyi b’uwo munyeporitike asanzwe atavuga rumwe n’umugambwe uri ku butegetsi CNDD FDD bakurikiranirwa hafi, bahirahiriye ngo barashikirije ico biyumvira baca bacakirwa. Ivyo bikaba vyashitse mu gihe uwurongoye umgambwe FNL mu ntara ya Muyinga MINANI Samuel, yafashwe arapfungwa, co kimwe n’uwurongoye uwo mugambwe ishami rya Agathon Rwasa muri komine ya Gasorwe.

Yaba abo banywanyi ba Agathon Rwasa mu ntara ya Muyinga canke abafatiwe i Busoni mu ntara ya Kirundo, bose bagirizwa n’abarongoye izo komine kugumura abanyagihugu ko batokwiyandikisha mu bazitabira amatora yo mu mwaka w’2015. Abanywanyi ba Agathon Rwasa rero bakabona ko ari iterebwoba bariko baragirwako, mu gihe batanguye nabone kwiyandikisha kugira baze bitabire amatora nk’abandi.