Uburundi bushobora gutakaza ivyaranguwe mu myaka 20

Ishirahamwe OLUCOME riragabisha ko ata gikozwe, ibintu vyose abarundi bashitseko mw’iterambere mu myaka 20 bishobora gusenyuka, kubera ingene abanyeporitike bigenza, ntibabone ibibazo bihari.

Iryo shirahamwe rirwanya abarya igiturire rivuga ko benshi mu banyeporitike b’Abarundi bigumira mu majambo asosa ya poritike gusa, ntibarondere gutora umuti w’ibibazo nyamukuru bihari, n’ubukene buhari ntihagire uwubuvuga.

Kubwa Gabriel RUFYIRI, umukuru w’ishirahamwe OLUCOME, inkomoko y’ibibazo biri mu Burundi ni intwaro mbi ifatiye kuri poritike n’ubutunzi, aho abanyeporitike bareka gufata mu minwe ibibazo vy’ubutunzi, bakaguma mu mvugo za poritike. RUFYIRI ati : "Uburundi bushobora kumera nka Somalia, Libia, Irak, aho usanga abantu baguma baryana, ariko ata kintu kizana ineza y’igihugu bariko baravuga."

Gabriel RUFYIRI, umukuru w’ishirahamwe OLUCOME

Mw’ishirahamwe OLUCOME bakabona ko imvugo za poritike zari zikwiye gukoreshwa ari izotuma abarundi begerana, bakababwira imigambi y’iterambere, kurwanya ubushomeri, gusubiza agaciro amafaranga y’Uburundi, abavuga bose bagahiganisha imigambi y’ugutora umuti w’ivyo bibazo.

Mu migambi y’ukurwanya igiturire, Uburundi buri mu bihugu birya igiturire kurusha ibindi, OLUCOME ikavuga ko ivyo vyerekana igihugu gifise intwaro mbi, ari nayo ituma igihugu kija mu bibanza bitari vyiza.

Gabriel RUFYIRI agasaba abarongoye Uburundi ko bokwiyumvira inkomoko y’ivyo bibazo, bareke ukwikunda n’ugukunda amafaranga n’ubutegetsi, ahubwo biteho guteza imbere abanyagihugu babashize imbere.