Abanyagihugu bari imbere ya RPA bahakuwe n’ibiduga birasa amazi

Bimaze kuvugwa ko Bob RUGURIKA ariko ava mu ntara ya Muramvya aho yari apfungiwe, abanyagihugu bo mu gisagara ca Bujumbura baciye basubira kuja kumutegerera imbere y’ahakorera RPA. Ibiduga vy’igiporisi bitera amazi n’irangi, abaporisi bitwaje inkizo n’inkoho bari bacunganye n’abanyagihugu ijisho ku rindi, mu nyuma ibintu birahinduka.

Bob aramutsa abanyagihugu ashitse muri RPA

Imbere y’ahakorera RPA hari abanyagihugu isinzi bariko baravyinan, bongera batamba nk’uko vyiriwe bimeze ku munsi w’ejo kuwa gatatu. Ariko rero kuri uno munsi abaporisi bahashitse kare, basa n’abambariye urugamba. Abakuru mu giporisi babatondeka ku mirongo itatu imbere y’abanyagihugu, abo nabo bitambira ataco binona. Uko umwanya wahera n’iko ibintu vyahinduka. Bob RUGURIKA amaze kwinjira mu buryo butangaje aho abari biteze ko yinjira mu kigo ca RPA ku mugaragaro bose batangaye bamubonye yamaze gushika hejuru agaca asohora amaboko akabaramutsa. Bamwe bashoboye kwurira ku ruhome rw’inzu RPA ikoreramwo hama Bob arabamutsa.

Abanyagihugu buriye ku ruhome rwa RPA

Bob amaze kwinjira aho asanzwe akorera, abaporisi n’abanyagihugu vyaciye bigenda gute?

Haciye hasohoka itangazo ry’igiporisi, rivuga ko abanyagihugu bose bari imbere ya RPA no ku mpande zose ziherereye mu burengero bwa RPA bahava maze bagataha. Bamwe bambara inkinzo, abandi bakenyera neza imisipi bafata neza n’inkoho zabo, ibiduga bibiri binini bitera amazi avanze n’irangi ry’ubururu, bose baca batangura gusunikana n’abanyagihugu mu nduru nyishi. Bamwe biruka baja ahitwa "Cercle Hippique" abandi Asiatique, buzura impande zose. Nta munyagihugu n’umwe yakubiswe canke ngo afatwe.

Igiporisi kimaze kuremerwa n’ubwinshi bw’abanyagihugu, cahavuye cikora kuri vya biduga bitera amazi, bongera barasa vya vyuka vyokera "Lacrymogenes’’, abanyagihugu nabo bakora hasi, babatera amabuye. Ariko abo baporisi ntibashoboye kubigiza inyuma kuko hari abantu benshi cane, aho n’igisagara ca Bujumbura cari carengewe. Ivyo biri uko mu gihe vyavugwa ko n’ibarabara riva mu Rumonge ryari ryugawe.

Gushika igihe c’isaha zitandatu, agahengwe n’uruja n’uruza vyari bitanguye kugabanuka mu gisagara ca Bujumbura. Bivugwa ko abo banyagihugu baciye bagenda mu Kamenge ahiciwe ababikira batatu b’Abataliyano, Lucia, Olga na Bernadette.

Amwe mu mafoto

Aba polisi barikanuye kandi biteguye

Ikiduga gitera amazi imbere y’abanyagihugu

Aba polisi biruka kubanyagihugu

Aba polisi biruka kubanyagihugu

Abanyagihugu bari muri "Cercle Hippique"

Aba polisi barikanuye kandi biteguye

Bahejeje gutera ivyuka vyokera

Abanyagihugu mw’ikarashishi bigina itsinzi

Abanyagihugu bari muri "Cercle Hippique"