Edouard NDUWIMANA : Ingwano y’ibihuha n’ibinyoma iracahari

Abashikiranganji batatu ba Reta y’Uburundi baheruka kuja gushimira abanyagihugu bo muri komine Murwi, babakeza ingene bigenjeje mu ntambara ihitiye mu ntara ya Cibitoke. Abo bashikiranganji babwiye abanyagihugu ko ingwano y’amasasu yaheze, ariko hagisigaye iy’ibihuha n’ukuremeka inteba ishushe abandi.

Umushikiranganji w’intwaro yo hagati mu gihugu Edouard Nduwimana, umushikiranganji wo kwivuna abansi Général-Major Pontien Gaciyubwenge, hamwe n’umushikiranganji ajejwe umutekano, Gabriel Nizigama nibo bari intumwa za Reta y’Uburundi muri komine Murwi. Mu butumwa bwa Reta abo bashikiranganji bari bagiye bitwaje, Edouard Nduwimana, umushikiranganji w’intwaro yo hagati mu gihugu yamenyesheje ko Reta ishigikiye kandi yabashimiye cane ingene abanyagihugu barwanije umwansi hamwe, muma komite y’umutekano, mu butandukane bwabo.

Edouard Nduwimana yabwiye abanyagihugu bo muri komine Murwi ko ingwano y’amasasu yaheze, ariko ko hagisigaye ingwano z’ibihuha, z’ukuremeka inkono ishushe abandi n’ingwano z’ibinyoma. "Mwime amatwi rero abantu baza bavuga ibinyoma, abantu baza barementanya, abantu bashaka gusubiza igihugu mu kaguma n’imigumuko."
Edouard Nduwimana yamenyesheje ko inzego z’umutekano zitazokwemerera umuntu wese azoza yigira akagaramaruganda mu gihugu, yitwaje icarico cose. "Reta, abajejwe intwaro hamwe n’abajejwe umutekano ntibazokwemera ko hari uwigira akagaramaruganda, uwushaka kurengera inzego z’igihugu."
Uwo mushikiranganji yasavye abo banyagihugu kuja hamwe bakarwanya uwo wese yoza ashaka kubaryanisha n’ukubigisha ko amatora adakenewe mu gihugu, kuko uwo aba ari umwansi w’igihugu ashaka ko mu gihugu haba intambara.

Umutego w’abadashaka amatora mu Burundi

Inyuma y’uwo mubonano n’abanyagihugu, abo bashikiranganji batatu baragiranye inama n’abaserukiye abandi mu buzi no mu ntwaro, Edouard Nduwimana akaba yabamenyesheje ko kw’igenekerezo rya 29 Nzero 2015 ariryo sango umurwi CENI uzogira inama n’abandi bajejwe ikibazo c’amatora, kugira barabe ko bikenewe ko abatashoboye kwiyandikisha bohabwa ikindi kiringo, kugira bashobore kwiyandikisha bazotore.
Edouard Nduwimana yaragabishije abo babjejwe intwaro ko bosigurira abanyagihugu ntihagire uzogwa mu mutego w’abadashaka ko amatora aba, bagahamagarira abanyagihugu gusubira kwiyandikisha, kugira bace bitwaza ko bafashe abiyandikishije kabiri. Naho atatomoye abo badashaka amatora abaribo, Edouard Nduwimana yagize ati : "Hari abashaka kwerekana ko ivyari vyabaye vyagenze nabi, bagahamagarira abanyagihugu kwiyandikishe kabiri."
Nk’uko vyashikirijwe n’uwo mushikiranganji, iyo nama ntibaye kubera igikorwa ca mbere cari cagenze nabi, ahubwo ni ukugira bashire imbere inama n’ibiganiro.