Indimi zibiri ku nkuru imwe yo muri Reta zigiye guhera

Abanyagihugu bagiye kutakuragirika kandi ku makuru aba yatanzwe avuye muri Reta, ivyo bikazoba kuko Reta iherutse gutunganya gushasha poritike yo kumenyesha amakuru atandukanye, yo mu bisata bitandukanye vy’ubuzima bw’igihugu.

Nk’uko bamwe mu bahinga muvyo kumenyesha amakuru babivuga, mu gihe Reta ari imwe, inkuru ziva muri Reta zotegerejwe kuba zimwe, n’aho muri Reta usanga hahurira imigambwe itandukanye. Ivyo rero bikaba vyotuma abanyagihugu baronka inkuru y’imvaho kubiba biriko birakorwa na Reta, mu gihe bikunda kwibonekeza mu bari muri Reta canke abavugizi bo mu bushikiranganji butandukanye, bakagaragaza indimi zirenga zibiri, ku kibazo kimwe kiba cerekeye igisata kimwe co mu bushikiranganji.

Mwomenya ko na bamwe mu bavugizi b’ubushikiranganji butandukanye canke ibisata bitandukanye vy’ubuzima bwigihugu, bakenguruka uwo mugambi wa Reta wo gutunganya gushasha poritike yo kumenyesha amakuru mu bisata vyayo. Bamwe mu bavugizi b’ubushikiranganji, bakavuga ko uwo mugambi uje hageze, kuko uzobafasha mu mirimo bajejwe ya minsi yose, kuko iyo mirimo yari ikeneye amategeko ayigenga. Eka ndetse, hari hakenewe umugambi wanditse, kugira nk’abajejwe gutanga amakuru mu bushikiranganji butandukanye hamwe n’amashirahamwe n’inzego zitandukanye, baronke ico bafatirako mu mirimo yabo.

Twobamenyesha kandi ko, ivyo Reta iriko irakora bigiye kumenyekana gusumba, kubera abajejwe ico gikorwa bazoshikiriza inkuru ku vyo Reta iriko irarangura.