Isanganya ryatumwe n’umunezero udasanzwe w’umwaka mushasha

Abantu batandukanye baraye barahimbaza umwaka mushasha mu mihingo itandukanye y’u Burundi, eka no mu gisagara ca Bujumbura umwaka mushasha ukaba wahimbarijwe ahantu hatari hake.

Bamwe baraye gukengurukira Imana kubona yarabarinze, ikabashikana muri uyu mwaka wundi, abandi nabo bawuhimbarije mu butambiro, mu mazu y’ubunywero, mu miryango yabo, n’ahandi. Abo bose bivanye n’uburyo bwabo, bakaba barahimbaje amaza y’umwaka mushasha.

Ariko rero hakaba hari abanezerewe cane, ndetse birashika naho biyibagira. Ivyo bikaba ari ivyashikiye abasore bari bavuye kunezerwa, aho bagonze uruzitiro rw’ibanki CRDB, umwe akaba ariwe yakomeretse, mu gihe iyo modoka yarimwo bane. Uwariko aragendesha uyo muduga akaba yagenda ataco yinona, kandi biboneka ko we nabo bari kumwe bari barushe, niko guca bahitana icapa co kw’ibarabara, mu nyuma baca bagonga urwo ruzitiro, muri aka gatondo ku wa mbere Nzero umwaka w’2014.

Tukaba twobamenyesha ko, gushika nk’isaha zitatu z’agatondo, rumwe mu rwaruka rwagenda ruravuza amahoni y’imiduga, ubona ko umunezero ari mwinshi, ariko rukibagira ko rwari mu miduga, utaravye neza ngo uwugendeshe ukurikije amategeko, ugashobora kuhasiga ubuzima.