Ishirahamwe mpuzamakungu ONU ryakebuye abanyeporitike bo mu Burundi

Umunyamabanga mukuru w’ishirahamwe mpuzamakungu ONU, Ban Ki-Moon yamenyesheje amakenga afise ku cuka ca poritike kiri mu Burundi, aho habaye ugutana mu mitwe hagati y’abanywanyi b’umugambwe MSD, hamwe n’abajejwe umutekano. Ban Ki-Mon yahamagariye impande zose kwihanganirana kugira umutekano ntuhungabane.

Mw’itangazo yasohoye, Ban Ki-Moon, umunyamabanga mukuru w’ishirahamwe mpuzamakungu ONU, yasavye abo vyega bose ko bokwubahiriza ubwigenge bwo gushikiriza ivyiyumviro, kugira n’abatavuga rumwe n’ubutegetsi bubahirizwe mu ntwaro rusangi.
Kubwa Ban Ki-Moon, ukwubahiriza ubwigenge bwo gushikiriza ivyiyumviro, hamwe n’ukureka n’abandi bagakora mu mwidegemvyo, nivyo bizofasha igihugu c’Uburundi gushika mu matora yizewe, kandi ahuza bose mu mwaka w’2015, mu ntwaro rusangi.

Mw’ishirahamwe mpuzamakungu ONU basavye abatwara, abanyeporitike bose, hamwe n’abahurikiye mu mashirahamwe adaharanira ivyicaro vya poritike ko boja hamwe, batorere inyishu ibibazo bihari, ishirahamwe mpuzamakungu ONU naryo rikaba ryiyemeje kubashigikira.

Umunyamabanga mukuru w’ishirahamwe mpuzamakungu ONU, Ban Ki-Moon

Muri iryo tangazo, mw’ishirahamwe mpuzamakungu ONU barangije bahamagarira imigambwe yose gutanguza uruganda rwo kurwanya uguhohoterana n’ukutihanganirana muri poritike, imbere y’uko ikiringo c’amatora kigera, kandi bose bame bibuka ivyo biyemeje mu rupapuro rw’inzira rwemejwe muri Ntwarante 2013, hamwe n’amasezerano y’i Arusha.