Mu gisagara ca Bujumbura amatara yo kw’ibarabara arageramiwe

Amatara aheruka gushirwa ku mabarabara amw’amwe yo mu gisagara ca Bujumbura kugira aboneshe mw’ijoro arabangamiwe n’abagendesha imiduga kuko baza barayagonga .Abanyagihugu bakaba bibaza uwujejwe gukingira no gukurikirana ayo matara na rirya afitiye akamaro kanini abanyagihugu.

Ntawuyobewe ingorane abiyunguruza mw’ijoro bagira mu gihe baca ahatabona kuko benshi bagira ingorane zo guhura n’abagizi ba nabi bikinga agahumbezi.Abanyagihugu bari bashimye ko igisagara gisigaye kibona ariko abagendesha imiduga batanguye kugonga ivyuma biriko ayo matara.Ntawuzi ko ababigonga babikora k’ukutamenya gutwara umuduga ,kubera akaborerwe canke ko babigira nkana.

Bamwe n’abandi bakaba bipfuza ko vyokingirwa abashwe bakoze amakosa nk’ayo bagahanwa.Ariko benshi bakaba bibaza uwujejwe gukingira ivyo vyuma vy’amatara n’uwubisubiriza igihe bihuye n’isanganya.

Ayo matara ava ku mishwarara y’izuba ari ku mabarabara amwe yo mu gisagara ca Bujumbura,nko kw’ibarabara ryitiriwe uwa mbere munyonyo no kw’ibarabara ryitiriwe umunyagihugu w’umurundi abonesha neza ku mugoroba.Ariko rero hafi y’uruzi Ntahangwa vyarononekaye biguweko n’ibiti vyahenutse kubera umuyaga mwinshi.

Abantu rero batembera mw’ijoro ari nabo babona akamaro ko kuba hari amatara ku mabarabara bipfuza ko ingingo zofatwa ku bagendesha imodoka bagonga ayo matara ,bagasaba igipolisi gicungera umutekano wo mw’ibarabara guhana bimwe vy’akarorero bisunze izo ngingo zizoba zafashwe.