OLUCOME yasavye Museveni kwihutira gutanguza ibiganiro

Ishirahamwe OLUCOME ryandikiye umukuru w’igihugu ca Ouganda, akaba n’umuhuza mu bibazo vy’abarundi, bamusaba ko yotanguza vuba ibiganiro mu ntumbero y’ugukungira abanyagihugu babandanya kugandagurwa.

Mu rwandiko ishirahamwe OLUCOME ryarungikiwe Yoweli Kaguta Museveni, Gabriel RUFYIRI yamenyesheje ko yizeye ko inyishu y’ibibazo biri mu Burundi izotorerwa ku meza y’ibiganiro, agasaba ko vyotanguzwa vuba kugira amahoro n’umutekano bisubire kuboneka mu Burundi. Iryo shirahamwe risaba impande zitavuga rumwe, Reta hamwe n’abatavuga rumwe na Reta bahurikiye mu runani CNARED ko boganira bavugana ukuri, kuko inzira y’ibirwanisho itazana amahoro abarundi bakeneye.

Muri iryo kete ryarungikiwe n’abandi bakuru b’igihugu bose ba Afrika y’ubuseruko hamwe n’umukuru w’iguhugu ca Afrika y’epfo, ishirahamwe OLUCOME ryasavye umuhuza Kaguta Yoweli Museveni ko yosigurira Reta ikabona ko ibibazo bihari, ntihagume havugwa ko amahoro n’umutekano bisasagaye, kandi abantu badasiba kugandagurwa.

Gabriel RUFYIRI, umukuru w’ishirahamwe OLUCOME

Kaguta Yoweri Museveni yasabwe kandi kugondoza ubutegetsi bw’i Bujumbura buganire n’abo batavuga rumwe vy’ukuri, harimwo na CNARED, hamwe n’abandi bose batavuga rumwe n’ubutegetsi. Gabriel RUFYIRI amenyesha ko gusohora imitahe y’uguhagarika abatavuga rumwe n’ubutegetsi, abamenyeshamakuru hamwe n’abo mu mashirahamwe adaharanira ivyicaro vya poritike, atariyo nzira y’ugutorera umuti ibibazo bihari, Reta igasabwa kubihagarika, amaradiyo akugururwa, n’amashirahamwe yugawe agasubira guhabwa uburenganzira bw’ugukora.

Ishirahamwe OLUCOME risanga ibiganiro arivyo vyonyene vyotuma ugushamirana hagati y’impande zitavuga rumwe guhagarara, amahoro akagaruka, n’ubutunzi bugasubira kwisununura muri iki gihe abarundi bakenye, amafaranga akaba asigaye aja mu mifuko y’abantu bamwe bamwe batunze kurusha na Reta.