Tharcisse GAHUNGU arongoye COSYBU ari mu minwe y’igipolisi

Umukuru w’urunani rw’amasendika mu Burundi COSYBU Tharcisse Gahungu ari mu minwe y’igipolisi kuva kuwa gatatu igenekerezo rya 28 Kigarama 2016.Yafashwe yagirizwa kuba yariko agirisha inama idaciye mu mategeko.

Tharcisse Gahungu arongoye COSYBU yafatiwe muri zone Ijenda, Komine Mugongo-Manga , mu ntara ya Bujumbura,ari kumwe n’abandi harimwo umukuru wa sendika y’abakozi ba SODECO na COGERCO, n’umufashabikorwa wabo .

Umukuru w’urunani rw’amasendika COSYBU yahagaritswe ku rwandiko rwateweko umukono n’umuyobozi mukuru w’ihinguriro ry’icayi OTB jacques Bigirimana,aho yasaba ubushikiranganji bw’umutekano gufata ingingo zose zishoboka kugirango babuze inama yahuza abarimyi b’icayi n’abayobozi ba COSYBU.

Icegera c’uwurongoye COSYBU Celestin Nsavyimana aranegura ingene bagenzi we bahagaritswe kandi ku bwiwe bariko bakora inama yemewe n’amategako,kuko inama z’amasendika ari inama ziba zizwi kandi zirekuwe n’amategako.

Mu gipolisi c’Uburundi babicishije ku cegera c’umuvugizi waco Moise Nkurunziza bamenyesha ko abo bahagaritswe bapfungiwe mu biro bikuru vy’igendereza ku mvo z’amatohoza.