Uburundi bwibutse imyaka 24 iheze Melchior NDADAYE agandaguwe

Yanditswe na Vianney BIKORIMANA
Kuya 21 Gitugutu 2017 saa 01:49
Yasomwe : 23940
0 0

Umwungere wa Diyoseze ya Bujumbura Evariste NGOYAGOYE yasavye abarundi bose kwibukira hamwe igandagurwa ry’umukuru w’igihugu Melchior Ndadaye, mu kwibuka ivyababaje n’ivyabatandukanije kugira bikubite agashi mu nzira yo gusubiza hamwe.

Musenyeri Evariste Ngoyagoye mu nsiguro yiwe mu misa yo kwibuka imyaka 24 iheze umukuru w’igihugu Melchior Ndadaye agandaguwe yishimikije amajambo ya Paul Mweranda avuga ko Imana yonyene ariyo ifise ububasha bwo gusubiza hamwe abatumvikana, ari naco gituma avuga ko mu kwibuka abantu bakwiye guhera kuri Yezu Kristu, kuko ariwe yeretse inzira abantu.

Umwungere wa Diyoseze ya Bujumbura yasavye ko abarundi bokwama bibuka kahise, kugira kabafashe gutsimbataza hamwe no gukomeza akaranga gashingiye kw’ishaka ry’Imana.

Inyuma y’imisa, ibirori vyo kwibuka igandagurwa rya Melchior Ndadaye vyabandanirije mu kibanza yashinguwemwo, aho haciye hashirwa ingori z’amashurwe ku ntatemwa y’uwo muhisi hamwe no ku zindi ntatemwa ziri muri ico kibanza c’abagandaguriwe ku musi umwe na perezida Melchior Ndadaye.

Mu gushira izo ngori ku ntatemwa, hatanguye umukuru w’igihugu c’Uburundi Petero NKURUNZIZA, hakurikira abaserukira ibihugu vyabo mu Burundi, hasubira umuryango wa perezida Melchior Ndadaye hamwe n’imiryango y’abari basangiye amabanga yo kurongora igihugu na Melchior Ndadaye bagandaguwe muri ico gihe, haca hakurikira n’imigambwe hamwe n’amshirahamwe yemewe n’ametegeko mu gihugu.

Ibirori vyasozewe no kumviriza ijambo ryashikirijwe na perezida Melchior Ndadaye igihe yimikwa mu mabanga y’umukuru w’igihugu mu matora yari yatsinze yo mu mwaka w’i 1993.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha