Akajagari kagabanutse kw’ishure ry’imyuga ETS Kamenge

Inyuma y’indwi yose abanyeshure bo kw’ishure ry’imyuga ETS barungitswe muhira iwabo mu kurundira ko akajagari kari kamaze iminsi kuri iryo shuri gatorerwa umuti, kuri uno munsi wa mbere igenekerezo rya 10 Ruhuhuma basubiye mu mashure, ivyigwa biriko biratangwa ukuri kwamye.

Iminsi indwi yose bari mu mihana iwabo birukanywe, ku munsi w’ejo k’uw’Imana abanyeshure biga kw’ishure ETS Kamenge, baherekejwe n’abavyeyi babo barasubiye ku mashure. Intumwa yari yavuye mu bushikiranganji bw’amashure mato mato n’ayisumbuye ikaba yafashe ingingo yo kwirukana abanyeshure batatu ariwe Jean claude Nkeshimana batazira komiseri bivugwa ko ari imbonerakure yo mu mugambwe CNDD-FDD yica agakiza kuri iryo shure, uwundi yirukanywe ni umunyeshure Mariko Ndereyimana avuga ko yaheruka guhabwa ishano kuri iryo shure bamuhora ko ari umunywanyi wa MSD, hamwe n’uwundi munyeshure azwi kw’izina rya Ferdinand Manirerekana.

Amakuru dukura kuri ETS Kamenge akavuga ko mu kanama kaciye gakwirikira hagati y’abavyeyi n’intumwa y’ubushikiranganji bw’amashure mato mato n’ayisumbuye, abavyeyi boba baranse kwemera iyo ngingo, kuko ku bwabo, mu gihe umurwi washizweho kugira wige ico kibazo, igihe icegeranyo c’amatohoza kitaraboneka iyo ngingo yo kwirukana abo banyeshure yoba irabangira.

Tubamenyeshe ko inyuma y’ibogozwa ry’umuyobozi w’ishure ETS n’umuyobozi w’ubuhinga, abo bategetsi bompi bamaze gusubirizwa, ubu ababasubiriye bakaba bariko barakora ukuri kwamye. Abanyeshure nabo nyene bari mu mashure bariko bariga ukuri kwamye.