Igihano c’umunyororo w’imyaka ibiri kigiye gusubirizwa n’ibikorwa ngirakamaro

Igihano c’imyaka ibiri kigiye gusubirizwa n’ibikorwa ngirakamaro, ivyo bikaba ari bimwe mu bigiye gukorwa n’ubushikiranganji bw’ubutungane, mu ntumbero yo kugabanya ubwinshi bw’abanyororo mu mabohero.

Umushikiranganji w’ubutungane Pascal Barandagiye yaratunganije inama mu ntara ya Ngozi ku bakuru bo muri ubwo bushikiranganji arongoye, mu ntumbero yo kurabira hamwe ibikorwa baranguye mu mezi atatu yo mu mpera z’umwaka w’2013. Muri rusangi, ubwo bushikiranganji burashima ibikorwa bwaranguye, na cane cane ko abacamanza bateye intwambwe mu guca imanza, kuko bavuye ku bice 4,2 kw’ijana ku mucamanza umwe baja ku bice 5,4 kw’ijana, ubu bakaba bihaye intumbero y’uko boshika ku bice 6 kw’ijana.

Pascal Barandagiye, umushikiranganji w’ubutungane

Mu bigiye gukorwa, umushikiranganji Pascal Barandagiye amenyesha ko igihano kiri munsi y’imyaka 2 kigiye gusubirizwa na gukora ibikorwa ngirakamaro, ivyo bikazokorwa mu ntumbero yo kugabanya igitigiri c’abanyorororo bari mu mabohero, kuko na kare batwara uburyo bwinshi cane. Izindi ngingo zigiye gufatwa mu ntumbero yo kugabanya abanyororo mu mabohero, ubu bakaba bagiye kunyarutsa guca imanza, hamwe no kunyarutsa gukora ibishoboka vyose kugira ababa bagiriwe amahirwe yo kuronka ikigongwe c’agateganyo, amadosiye yabo anyaruke kwigwa.

Umushikiranganji Pascal Barandagiye akaba yaboneyeho akaryo ko gusaba abacamanza kunyarutsa imanza, hamwe n’ukugerageza uko bashoboye kwose bagashira mu ngiro imanza ziba zaciwe. Amabohero afise ubwinshi bw’imbohe kurusha ayandi akaba ari ibohero rya Ngozi, Muramvya hamwe n’ibohero rikuru rya Mpimba.