Accueil > Ubuhinga bwa none > Inyabwonko > Irobo Curiosity yagize ingorane kuri Maris
Irobo Curiosity yagize ingorane kuri Maris
dimanche 3 Ntwarante 2013
Ikigendajuru citwa Curiosity carungitswe na Amerika kuri Mars, ntikiriko kirakora ubushakashatsi,kuko hari ingorane zadutse mu mamashini nyabwonko( Ordinateur) agenzura uko gikora.
Nk’uko ikigo Jet Propulsion Laboratory(JPL) gikurikirana ibikorwa vy’ico kigendajuru kibisigura,Curiosity cahagaritswe gukora ubushakashatsi bumwe bumwe muri ino ndwi,ibizotuma hagabanuka ibikorwa vyaco kugirango bagumane ibice bimwe bimwe bikoresha ubuhinga bwa none igihe bazoba bariko baratunganya ingorane yavuye kukudakora neza kw’icuma kibika ivyo gifashe.
Nk’uko bimeze ku bindi bigendajuru,Curiosity kirafise imashini nyabwonko zishobora kuba zirakora mu gihe imashini nyamukuru iba igize ingorane.
Ariko naho ibintu bimeze ukwo,ikigo JPL kiremeza ko hakiri imigenderanire hagati ya Curiosity n’isi.
Ico kigendajuru gifise amapine atandatu,nico cambere carungitswe ku yindi si gifise ivyuma bikora ubushakashatsi bishika kuri 10,cashitse iyo carungitswe muri Myandagaro umwaka uheze.
Ikigendajuru Curiosity carungitswe kugira kimare imyaka ibiri kiriko kigenzura ko ubuzima bwashobotse mu myaka iheze kuri Mars.
Joel Sengurebe
