Ishure shingiro: Abigisha barateguwe neza

Abigisha bagera ku bihumbi bitanu nibo bamaze guhabwa inyigisho zo kwitegurira umugambi w’ishure shingiro rizotangurana n’umwaka w’ishure w’2013 ushira uw’2014.

Nk’uko bimenyeshwa na Tharcisse Habonimana wo mu gisata c’ivyigwa muri BEPEB (Bureau d’Etudes des Programmes de l’Enseignement de Base), abigisha bazotangurana n’umugambi w’ishure shingiro barateguwe neza, aho amenyesha ko abo bigisha bakarihirijwe ubwenge ku buryo bazoshobora kwisunga indinganizo nshasha y’ivyigwa mu mugambi w’ishure shingiro.

Abanyeshure baharurwa mu bihumbi 139 n’amajana abiri bakaba aribo bitezwe mu ntango z’umwaka mushasha w’ishure uzotangura mu kwezi kwa Nyakanga, ishure rimwe rikazoba rishobora kwakira abanyeshure mirongo itanu.