Abahunze badakurikiranwa n’ubutungane basabiwe nabo ko bokwumvirizwa

Yanditswe na NDUWIMANA
Kuya 18 mai 2017 saa 08:55
Yasomwe : 27243
0 0

Umugambwe SAHWANYA FRODEBU Nyakuri Iragi rya NDADAYE uvuga ko ikibazo c’ibiringo vy’umukuru w’igihugu atariwo mwitwarariko ukomeye mw’ihinyanyurwa ry’ibwirizwa shingiro ry’Uburundi, uwo mugambwe ugasaba ahubwo ko ibwirizwa shingiro rizojaho ryotegekanya neza ingene amatora aba mu mwidegemvyo, kugira uwuzotwara Uburundi azobe ari uwatowe n’Abarundi.

Mu gihe umukuru w’igihugu aheruka gushiraho umurwi ujejwe kwiga ivyohinduka mw’ibwirizwa shingiro ry’Uburundi, umugambwe SAHWANYA FRODEBU Nyakuri Iragi rya Ndadaye usaba uwo murwi ko utokorera gusa ku cegeranyo cashikirijwe n’umurwi CNDI ujejwe ibiganiro, aho muri ico cegeranyo bashikirije ko Abarundi benshi basavye ko ibiringo vy’umukuru w’igihugu vyokurwa mw’ibwirizwa shingiro ry’Uburundi.

"Uwo murwi ujejwe gushikiriza ivyohinyanyurwa mw’ibwirizwa shingiro wosubira ukabaza abarongoye imigambwe, abarongoye amadini, abarongoye amashirahamwe, abaserukira urwaruka, abakenyezi, abamenyeshamakuru, hamwe n’imirwi y’abagendana ubumuga, abagendana ingwara zidakira, kugira ibwirizwa shingiro rizojaho rizobe ari iryubahiriza imirwi yose.", uko niko Keffa NIBIZI, umukuru w’umugambwe SAHWANYA FRODEBU Nyakuri Iragi rya Ndadaye yabishikirije, agasaba ko n’abanyeporitike bahunze Uburundi bokwumvirizwa, ariko ku bwiwe abokwumvirizwa akaba ari abadakurikiranwa n’ubutungane.

JPEG - 91.4 ko
Keffa NIBIZI, umukuru w’umugambwe SAHWANYA FRODEBU Iragi rya NDADAYE

"Mu barongoye imigambwe hari abahunze, ariko abanywanyi babo bari ngaha, tugasaba rero ko abaserukira iyo migambwe bari mu Burundi boshikiriza ivyiyumviro vy’imigambwe yabo. N’abakuru b’iyo migambwe bahunze boshikiriza ivyiyumviro vyabo babicishije ku buhinga ngurukanabumenyi, ariko aboshikiriza ivyo vyiyumviro akaba ari abadakurikiranwa n’ubutungane."


Kumenyekanisha

Kumenyekanisha

Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha