MSD : Umuhuza Benjamin Mkapa yavuze ivyavuye mu biganiro bitaratangura

Umugambwe MSD umenyesha ko utangazwa no kuba umuhuza mu biganiro vy’abarundi Benjamin Mkapa yamenyesheje ko habaye ukwumvikana ku bibazo bihanze igihugu, kandi abegwa n’ivyo bibazo bataratangura kubiharirako.

Mw’itangazo umugamwe MSD wasohoye kuri uno wa gatanu igenekerezo rya 24 Ruhuhuma,umwaka wa 2017, riterwako umukono n’umunyamabanga mukuru w’umugambwe Francois NYAMOYA, uwo mugambwe umenyeshako umuhuza yahejeje ibiganiro bitaranatangura.

Muri iryo tangazo,umugambwe MSD umenyesha ko wisunze ivyashikirijwe n’umuhuza Benjamin Mkapa, yobishikiriza inama idasanzwe y’abakuru b’ibihugu vy’akarere ka Afrika y’Ubuseruko kugira bige ku ntambamyi zibangamiye ibiganiro.

Umugambwe MSD umenyesha ko wisunze ivyashikirijwe n’umuhuza Benjamin Mkapa inyuma y’ibiganiro vyabaye kuva kw’igenekerezo rya 16 gushika kurya 19 Ruhuhuma,umwaka wa 2017,hari ukudatahura ikibazo kiri mu Burundi, hakaba kandi no guhengamira ku buryo bwinyegeje ku ruhande rwa Reta y’Uburundi.

Mwomenya ko umugambwe MSD utitavye ibiganiro vyabaye kw’igenekerezo rya 16 gushika kurya 19 Ruhuhuma,umwaka wa 2017,ukamenyesha ko wagumye umenyesha imvo zatumye utitaba ivyo biganiro.