Ishirahamwe OLUCOME risaba umuhuza kwongereza inguvu mu guhuza abarundi

Ishirahamwe ryishinze kurwanya igiturire n’abasesagura amatungo ya Reta OLUCOME risaba umuhuza akaba n’umukuru w’igihugu c’Ubuganda Yoweri Museveni kwongereza inguvu mu guherekeza abarundi mu nzira y’ibiganiro kugira haboneke inyishu zirama ku kibazo kiri mu Burundi.

Mw’ikete ryateweko umukono na Gabriel Rufyiri arongoye OLUCOME kuri uno wa mbere igenekerezo rya 11 Nzero 2016,rikarungikirwa umuhuza Yoweri Museveni OLUCOME risaba umuhuza mu matati y’Uburundi kwibutsa abakora amabi baba ku ruhande rwa Reta canke abatavuga rumwe nayo,ko bitebe bitebuke ubutungane bw’igihugu canke mpuzamakungu buzobakurikirana igihe kigeze.

Muri iryo kete,ishirahamwe OLUCOME rimenyesha ko ridashigikiye umuntu n’umwe canke ishirahamwe ryigisha amacakubiri afatiye ku moko kugira ashike ku butegetsi canke ribandanye riri ku butegetsi.

Ishirahamwe OLUCOME risaba umuhuza kwumvisha Reta y’Uburundi ko yosubira ku meza y’ibiganiro bihuza abarundi ataco irinze gusaba,ishize imbere ivyihutirwa na cane cane amahoro,umutekano n’ubutunzi vy’abarundi bose,ariko atari gushira imbere inyungu z’umuntu umwe. amashirahamwe akorera muri ico gisata ariko aregeranya ivyemezo.

Ishirahamwe OLUCOME ryibutsa kandi ko mu biganiro bihuza abarundi vyari bihagarikiwe n’ishirahamwe mpuzamakungu ONU,UA,CIRGL,na EAC bari bemeranije ko amaradiyo amwe yigenga yokwugururwa,abapfunzwe bagirizwa ko bagiye mu myiyerekano bakarekurwa,n’imitahe ihagarika indongozi zimwe mu Burundi igafutwa.