Ugukurwa kwa Rufyikiri kwoba kugira guherekezwe n’ipfungirwa mw’ibohero rya Mpimba

Inyuma y’aho Isidore Rufyikiri akuriwe mu rwego rw’abashingwamanza b’i Burundi agaca anatakaza ikibanza c’ukurongora abashingwamanza b’i Bujumbura, biriko binurwanurwa ko yoba agira ajanwe gupfungirwa mw’ibohero rikuru rya Mpimba.

Muri iki gihe bikavugwa ko hoba hari bamwe mu bahanuzi bo mu biro vy’umukuru w’igihugu boba bariko barakora ibishoboka kugira Rufyikiri aje mw’ibohero rikuru rya Mpimba.

Tukabamenyesha ko muri iki gihe, uyo yahoze ari umushingwamanza atariko aroroherezwa n’ubutegetsi, kuva aho aburijwe kwitaba inama y’abandi bashingwamanza yariko ibera mu gihugu ca Cote d’Ivoire, kuva ico gihe, akaba asigaye yamana imanza mu butungane, aho zimwe usanga zimwagiriza kurya ibiturire, izindi zikamwagiriza kutubaha inzego n’ugutyoza inzego za Reta mu kuvuga amajambo agumura abanyagihugu.