Umurwi wa Lion Story wagiriza ubutegetsi iburabuzwa ryawo

Abakunzi b’umurwi Lion Story baribaza igituma uwo murwi ukunzwe cane utakigirisha ibiteramo canke usohore indirimbo nshasha. Abaririmvyi bo muri uwo murwi bavuga ko babaye barakinjuye kubera ubutegetsi butariko buraborohereza mu kazi kabo.

Umurwi wa Lion Story utanga ubutumwa buciye mu ndirimbo zikozwe mu mudiho wa Raggae umaze iminsi utaboneka mu biteramo, impavu n’uko umurwi wagumye winanata gukora kugira ushike kw’ihangiro ryawo ariko uburagizwa. Ariko rero hageze aho iterabwoba bagirirwa rituma bakinjura.

Lion Story bavuga ko kubaburabuza mu kazi kabo ko gutanga ubutumwa biciye mu kuririmba bisa no kubuza inyoni kuririmba aho naho uba uyishe. Iburabuzwa n’ihigwa buhongo ry’abagize umurwi wa Lion Story vyagirizwa ubutegetsi kuko ataco bwigeze bukora kugira umutekano wabo ukingirwe kanatsinda ibiteramo vyabo biburabuzwa n’abaporisi, abo nabo baba bahawe itegeko. Ivyo bivugwa n’umwe mu baririmvyi bo mu murwi.
Abaririmvyi ba Lion Story bakavuga ko boba bariko bazira ubutumwa batanga budahimbara ubutegetsi.

Mwomenya ko ku munsi wa gatanu igenekerezo rya 04 Nyakanga 2013 kuri Vouvouzela, igiteramo ca Lion Story cahagaritswe inyuma y’iminota 40 gitanguye, bivuye kw’itegeko ry’uwurongoye igisagara ca Bujumbura.

Umviriza ubutumwa butangwa na Lion Story mu ruririmbo "izangondagonde"