Ibanki y’isi yose yiteguriye gufasha abagore bafatwa ku nguvu

Ibihugu bitatu ari vyo Uburundi, Urwanda na Repuburika iharanira intwaro rusangi ya Kongo nivyo bigiye kuronswa imfashanyo kugira birwanye ifatwa ku nguvu ry’abakenyezi.

Ibanki y’isi yose rero ikaba yatanze imiriyoni zigera kw’icumi z’amadolare y’Amerika kuri ivyo bihugu uko ari bitatu bisanzwe bihuriye mw’ishirahamwe ry’ibihugu biri mu karere k’ibiyaga binini mw’itangazo ryashizwe ahabona. Ayo mafaranga yose rero, akaba azofasha abagore bahura n’izo ngorane bo muri ivyo bihugu.

Mukamenya ko akarere k’ibiyaga binini gafise ibitigiri vyinshi vy’abakenyezi n’abana bakiri bato bafatwa ku nguvu. Ivyo bitigiri ahanini, bikaba vyadugijwe n’indwano zabaye muri ivyo bihugu uko ari ibitatu, aho hari imirwi ya bamwe mu barwanyi baca birara mu bakenyezi bakabashurashuza ku nguvu, ndetse n’ubu ako kabi kakaba kataratuzwa burundu.