Hong-Kong : Umugabo yagirijwe icaha co guteka abavyeyi biwe

Umugabo aturuka mu gisagara ca Hong-Kong yaciriwe umunyororo wo guherayo yagirizwa kwica abavyeyi biwe, abanje kubakata ibihimba vyabo mu duce duce imbere yo kubateka.

Henry Chau afise imyaka 31 yaremanze imbere ya sentare mpanavyaha ko yishe abavyeyi biwe n’ukuntu yabishe. Henry Chau avuga ko yabanje gukata ibihimba vyabo mu duce dutoduto nka kurya bakata inyama imbere yo kubateka, mu nyuma araheza atekera inyama z’abavyeyi biwe mu dukopo batekeramwo imfungurwa mbere aranashiramwo n’umuceri muri utwo dukopo.

Imitwe y’abavyeyi ba Henry Chau, umugabo Chau Wing-ki w’imyaka 65 hamwe na Siu Yuet-yee w’imyaka 62, yatowe mu kibanza bakanyishamwo ibintu (Refrigerateur) haheze iminsi myinshi baratakaye mu gihe umuhungu wabo yavuga ko bagiye mu rugendo mu gihugu ca Chine imbere yo kwemanga icaha yakoze kuri telefone ngendanwa abicishije ku butumwa. Ibindi bisigarira vyabo vyatowe mw’iyarara, hamwe n’ibikopo babikamwo imfungurwa.

Ku ruhande rwa Henry Chau, ariyemerera ko ari umurwayi wo mu mutwe (psychopathe) mbere akavuga ko adashobora gutahura ububabare bw’uwundi muntu kubera ubuzima yabayemwo mu gihe yari akiri umwana mbere ageze no mu myaka y’imiyabaga.