Ubudagi : Abantu bitwaje inkoho biraye mu bantu bari mu kaguriro barabarasa

Abantu umunani bapfuye abandi benshi barakomereka mu gitero cakozwe mu kaguriro kari mu gisagara ca Munich mu gihugu c’Ubudagi.

Amakuru atangwa n’ibinyamakuru vyo mu Budagi avuga ko ku mugoroba wo kuri uyu wa gatanu ariho abagabo bitwaje inkoho binjira mu kaguriro ka Oliympia gaherereye mu maja epfo y’igisagara ca Munich. Abo bantu bagenda barasa uwo babonye wese.

Umuvugizi w’igiporisi mu gisagara ca Munich yabwiye Reuters ko hashobora kuba hari abantu benshi bapfuye n’abakomeretse, ariko hamaze kumenyekana umunani gusa bapfuye.

Ntiharamenyekana uwoba ari inyuma y’ico gitero kibaye inyuma y’aho kuwa mbere umwimukira ateye abantu batanu bari muri gari ya moshi, ivyakozwe na Islamic State. Abanyagihugu b’i Munich basabwe kwirinda kuja mu mabarabara hamwe no mu bibanza bihuriramwo abantu benshi, n’ingendo zimwe zimwe zikaba zahagaritswe.