IKOH ivuga ko hari indirimbo yakoze ziriko zirasohoka hadakurikijwe amategeko

Yanditswe na MUGISHA Van Naris
Kuya 2 mai 2018 saa 05:25
7245
0 0

Ikoh Multiservice imenyesha ko hari indirimbo ziri mu mugambi "You’ll Love Changes", ikigabane ca kabiri ziriko ziraca ku buhinga ngurukanabumenyi hadakurikijwe amategeko, kandi hatari bwagere ko zisohoka, kuko bariko bariga inzira zo kuzisohoramwo. Ikoh Multiservice igasaba amaradiyo canke ibinyamakuru ko bitohanahana izo ndirimbo, ahubwo ko kugira umuziki w’Uburundi ugire agaciro, bofasha kurondera abariko barazihanahana.

Amakuru ava muri Ikoh Multiservice, avuga ko vyose vyatanguye kumenyekana kuri uwu wa kabiri igenekerezo rya 1 Rusama 2018, igihe baronka amaterefone y’abamenyeshamakuru abahamagara ababaza ibijanye n’izo ndirimbo zitatu, ziri mu rukurikirane "You’ll Love Changes", ikigabane ca kabiri.

Ikoh Multiservice imenyesha ko batangaye, kuko mu bisanzwe indirimbo ziri mu rukurikirane "You’ll Love Changes VOLII" bakoranye n’abaririmvyi babiri, uko zisohoka zigatangura kuvuzwa bizwi kandi biri mu masezerano.

Ikoh Multiservice, ivuga ko gusohora indirimbo gushika aho ivuzwa, bisaba ibikorwa bitari bike, kandi mu gihe isohotse bidaciye mu mategeko, uruhombo rushika ku batari bake, mu gihe uwayitunanije aba afise ihangiro agomba gushikako.

Ikoh Multiservice ivuga ko idashobora kwihanganira ibintu nk’ivyo bikozwe hatisunzwe amategeko, ari naco gituma igiye kwitura ubutungane, kugira bufashe kurondera abo bantu bivye ibikorwa vyayo.

Kuri ivyo vyose, IKORICIZA Haruna arongoye Ikoh Multiservice ahamagarira uwoba yarashize ahabona izo ndirimbo atabizi kuzifuta, kandi asabe n’ikigongwe.


Kumenyekanisha

TANGA ICIYUMVIRO

AMATEGEKO AGENGA IYANDIKWA RY’ICIYUMVIRO CAWE

Kumenyekanisha

Kumenyekanisha
Kumenyekanisha

Kumenyekanisha